సాహితీ గౌతమి

సాహితీ గౌతమి సాహిత్య, సంగీతాల పట్ల రాజమoడ్రి నగర ప్రజలలో ఆసక్తిని  పెంపొందించాలనే   ఉద్దేశ్యముతో  ప్రారంభమయింది. వర్ధమాన కవులు, రచయితలను, వారి రచనల్నిప్రోత్సహించి, ఆవిష్కరించడం,సాహితీ ప్రసంగాలు, లలిత గీతాలు, భావ గీతాల ప్రాచుర్యం,విద్యార్ధులు,నడి వయస్కుల వారిని  సాహిత్య సంగీత కార్యక్రమాలకు ఆకర్షించడం వంటివి సాహితీ గౌతమి కార్యక్రమాలు.

సాహితీ గౌతమి మొదటి కార్యక్రమం 24-8-1999 న, శ్రీ కొంపెల్ల రామకృష్ణ మూర్తి  గారి కవితా సంపుటి " వెన్నెలలో వడగాల్పులు " ఆవిష్కరణ, తరువాత కొన్ని సాహితీ ప్రసంగ కార్యక్రమాలు జరిగాయి. 2003 లో అధ్యక్షులు, ఉపాధ్యక్షులు, స్థానాంతరణ పై రాజమండ్రి వదలి వెళ్ళిపోగా కార్యక్రమాలు స్తంభించిపోయాయి.

తిరిగి 2010 లో సాహితీ గౌతమి కొత్త బలాన్ని పుంజుకుంది.

భావ గీతాలను ప్రోత్సహించాలనే ఉద్దేశ్యం తో, మాకు తెలిసిన కొన్ని భావ గీతాలను శ్రవణ సంపుటాలుగా వెలువరించాము. మొదటి శ్రవణ సంపుటి, " వెల్లువ ", ను లెఫ్టినెంట్ జాస్తి మూర్తి గారు 4-11-2010 న ఆవిష్కరించారు భావ గీతాల శ్రవణ సంపుటి - 'వెల్లువ' కు లభించిన విశేష స్పందన వలన కలిగిన ఉత్సాహంతో మరో రెండు భావ గీతాల శ్రవణ సంపుటాలు " హరివిల్లు, విరిజల్లు " లను 30-05-2012 న  తీసుకువచ్చాం. వాటిని లోక్ సభ సభ్యులు గౌ||శ్రీ ఉండవల్లి అరుణ్ కుమార్ గారు, రాజమండ్రి శాసనసభ్యులు శ్రీ రౌతు సూర్య ప్రకాశరావు గారు, లెఫ్టినెంట్ మూర్తి గార్లు ఆవిష్కరించారు. ఈ భావగీతాల సంపుటాల ప్రచురణకు ఓ.ఎన్.జి.సి అందజేసిన ఆర్ధిక సహాయం హర్షణీయం.ఈ భావ గీతాలను వినాలనుకునేవారు ఆయా గీతాల మీద క్లిక్ చేసి వినవచ్చు, డౌన్ లోడ్  కూడా చేసుకోవచ్చు.గీతాల సాహిత్యం కూడా పొందుపరచాం.పాడుకుని ఆనందించండి, మీకు తెలిసినవారందరికీ వినిపించండి.

విజయవాడ బుక్ ఫెస్టివల్ సొసైటీ మరియు నేషనల్ బుక్ ట్రస్ట్ ల సంయుక్త ఆధ్వర్యంలో నిర్వహించిన రాజమండ్రి పుస్తక మహోత్సవము(23-11-2012 నుండి 2-12-2012 వరకు ) లో సాహితీ గౌతమి ద్వారా అనేక కార్యక్రమములు చేశాము. ఆధునిక యుగంలోని పాశ్చాత్య సాంప్రదాయానికి మడుగులొత్తుతున్న నేటి యువతరానికి తెలుగు మాధుర్యాన్ని పరిచయం చేయడానికి సాహితీ గౌతమి కృషి చేసింది. ఇందులో భాగంగా, విద్యార్థినీ విద్యార్థులకు పొటీ కార్యక్రమాలు నిర్వహించింది. 

కొత్త పుస్తకాల ఆవిష్కరణ (ఆకులో ఆకునై-2012, అమ్మ చెట్టు-2013), పుస్తక పరిచయాలు, సాహితీ ప్రసంగాలు, భావ గీతాల ప్రోత్సాహం వంటివి మేము చేసే కార్యక్రమాలు. 

 

మున్ముందు, అందరి సహకారం తో, మరెన్నో సాహిత్య,సంగీత కార్యక్రమాలను చేయాలని మా సంకల్పం.

  

Read More

శ్రవణ సంపుటాల పరిచయం

                                                   శ్రవణ సంపుటాల పరిచయం  

                            తెలుగులో భావగీతాలు, గజల్స్  లాంటివి ఎన్నో వస్తున్నాయి వాటిని ఔత్సాహికులు ఒకరి నుండి ఒకరు నేర్చుకోవటం ద్వార మాత్రమే ప్రాచుర్యం పొందుతున్నాయి గాని అవి సంగీత ప్రియులందరికీ చేరడంలేదు.అలా మరుగునపడి ఉన్న భావ గీతాలు కొన్నింటిని సేకరించి అందరికీ అందుబాటులోనికి తేవటానికి    సాహితీ గౌతమి, రాజమoడ్రి సంకల్పించింది.

                            ప్రస్తుతం వెల్లువ, హరివిల్లు, విరిజల్లు  అనే మూడు ఆల్బంలను వెలువరిస్తున్నాము. వీటికి       ఓ.న్.జి.సి  ఢిల్లీ  వారు చేసిన ఆర్ధికసహాయం హర్షణీయం. మున్ముందు మరెన్నో భావగీతాల్ని తెలుగు వారికి అందించాలని మా ఆకాంక్ష .

                          ఈ ఆల్బంలలో భావాగీతాలతో పాటు తెలుగు గజల్స్ కూడా ఉన్నాయి .తెలుగు భాషలో వచ్చిన తొలి గజల్ శ్రీ దాశరథి గారి " రమ్మంటే చాలుగానీ". దీనిని పరిచయం చేయడం మాకు గర్వకారణం.

                          భావగీతాలలో గమనించాల్సిన విషయం ఏమిటంటే, కొన్ని గీతాలకు ఒకటికంటె ఎక్కువ బాణీలున్నాయి. అలానే సాహిత్యంలో కూడా  స్వల్పమార్పులున్నట్టు  తెలుస్తోంది  . కానీ ఆయా గీతాల్ని మాకు వినిపించిన గాత్రంలో, వారికి తెలిసిన బాణీలలోనే, వారి దగ్గరున్న సాహిత్యంతోనే  ఈ అల్బంలను  చేశాం.

                         శ్రోతలు తమకు తెలిసిన భావగీతాలు, గజల్స్ లను సాహితీ గౌతమికి అందించగలిగితే వాటిని రాబోయే సంపుటాలలో పొందుపరచగలం.
                     
                        మా ఈ ప్రయత్నంతో తెలుగునాట ప్రతీ నోటా భావగీతాలు వెల్లువెత్తాలని మా ఆకాంక్ష .

                           స్వాగతం, భావగీతాల జల్లుల వెల్లువలో ఓలలాడండి ! 

Read More

మనసనేది లేని నాడు (గజల్)

మనసనేది లేని నాడు లేవు ప్రేమ గాధలు   

వలపనేది లేక లేవు తీపి గుండె కోతలు    

తెలివెన్నెల రేలలో వికసించే తలపులలో 

అనుభవాలు లేక లేవు మధురమైన ఊహలు 

ఆ ఊహలలో తమకించే మరపురాని ఘడియలు    || వలపనేది ||

చూపులలో వసంతాలు కొలువుతీరు వేళలో 

అనుభూతులు లేక లేవు కొత్త బ్రతుకు ఊసులు 

ఆ ఊసులలో చిగురించే కమ్మనైన తావులు           || వలపనేది ||

తొలిమోజుల తొలకరిలో గానమైన భావనలో 

కరిగిపోని జీవితాన లేవు కళలు కాంతులు 

ఆ కాంతులలో పయనించే పరిమళాల వాకిలులు    || వలపనేది ||

                                                                                             రచన : శ్రీ కలగా కృష్ణమోహన్ 

                                                                                             సంగీతం : శ్రీ పి.ఏ.రాజు 

ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/listen/350nd1djw7asb5w/07.manasanedi.mp3

Read More

కలల కడలిలో(గజల్)

కలల కడలిలో కలికి ముత్యమై  (2)

కనుల కొలనులో చిలిపి నృత్యమై 

ఉండిపోవా కలలలోనా 

నిలిచిపోవా కనులలోనా 

తారలనే అడుగుతాను నిన్ను విడిచిపొమ్మని 

చందురునే కోరుతాను నిన్ను మరచిపొమ్మని

మేఘాలను వేడుతాను నిన్ను పోనిమ్మని 

నీ రాకే తోడై నా యెదను పూలు పూచే           || ఉండి ||

హృదయమనే తలుపు తీసి నిన్ను స్వాగతించినాను
ద్వారమందు నిలిచి  నీవు బేల చూపు చూసినావు

హృదయమా నాహృదయమా (2)

ఆమె స్మృతులే ఇక నీకు జతుల గతులు        || ఉండి ||

కలలోనే  జీవితాన్ని కడతేరి పోనీ 

కనుల నీరు  కడవరకు అటుల నిలిచి పోనీ 

కలకాలం నీ రూపే తలచుకొనీ (2)

నీ రాకే తోడై నా యెదను పూలు పూచే           || ఉండి ||

నీవులేని ప్రతిక్షణము యుగయుగాల నిరీక్షణము

నీ వలపు పిలుపు కోటి వసంతాలు నిలుపు 

ఏలనన్నువీడి నీవు దూరమౌతావు 

నువులేని బ్రతుకునకు ఏదీ మరి తావు        || ఉండి ||

                                                                              రచన : శ్రీ పి.ఏ.రాజు 

                                                                              సంగీతం : శ్రీ నిర్మల్ కుమార్ 

ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/?62va3do5k414tr2

Read More

వాలు చూపుల (గజల్)

వాలు చూపుల గాలమేసి 
నన్ను దోచే ప్రేయసి

వింతగా నను చూడకే చెలి 

వేగరావే నా దరి                 || వా ||

నీలికన్నుల నీవు  చూసిన

వలపు పూలై విరిసెనే

పరిమళించి - పరవశించి (2)

వేణుగానము చేసెనే  (2)

మది వేణురాగము తీసేనే  || వింతగా   ||

గుండెలో నువు నవ్వినంతనే  

కోటివీణలు మ్రోగునే

ఓపలేని తాపమేదో (2)

నన్ను తొందర చేసెనే  (2)

మదిలోన విందులు చేసెనే  || వింతగా  ||

                                                   రచన : శ్రీ కోపల్లె శివరాం 

                                                   సంగీతం : శ్రీ నిర్మల్ కుమార్ 

ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/?heaj8am1xk99cj6

Read More

చెలియందె మ్రోగింది

చెలియందె మ్రోగింది  - మృదు మధుర వీణలా 

నా యెడద నలరించు  - సుమనోజ్ఞ  కవితలా  || చెలియందె ||

నా హృదయ రంగాన - ఆమె వెన్నెల కూన 

ఆమె పాదము  మ్రోల - గరికనై నిలతునా 

నా యెడద నలరించి - నర్తించు నామె 

అనురాగ వేదినై - నిలిచిపోదును నేనే   || చెలియందె ||

అలదూర దూరాల - ఆ అందె మ్రోగినా  

నా తలపు లో  కురియు  - అందాల  విరి  వాన 

అందెలా అవి  - వలపు గుడిలోని  ఘంటికలు 

అక్షరాకృతి లేని - సుమనోజ్ఞ  గీతికలు  || చెలియందె ||

ఆమె ఒడిలో నేను - పసివాడనెప్పుడూ

ఆ భావ మిసుమంత - వసివాడదెప్పుడూ

శృంగార సామ్రాజ్య కేతనమ్మే ఆమె 

ఆ నీడలో బ్రతుకు ప్రణయ జీవిని నేనే    || చెలియందె ||   

                                                                రచన: శ్రీ  కొంపెల్ల.రామకృష్ణ మూర్తి ,

                                                                సంగీతం : శ్రీ  సుందర రావు,

                                                             

ఈ పాట కావాలా? అయితే వినండి లేదా డౌన్ లోడ్ చేసుకోండి

http://www.mediafire.com/?2kx9bg748lz8mbb

Read More

గుండె భగ్గున

గుండె భగ్గున మండితే

కన్నీట ఆర్పుట నేర్చుకో 

వాసంత మృదు హృదయమ్ములో 

గ్రీష్మమ్ముకలదని తెలుసుకో          || గుండె భగ్గున ||

జాలి మాలిన వారికై

ఎలుగెత్తి పాటలు పాడిపాడి   (2)

బ్రతుకులో అలజడియె గాని 

శాంతియన్నది నోచకుంటే   (2)     || గుండె భగ్గున ||  

జరిగిపోయిన కాలమే

శివరంజనీ రాగమ్ముగా      (2)

మనసులో నీ తనువులో 

మార్మ్రోగి  మరి మరి తరిమితే (2)       || గుండె భగ్గున ||

నీ విషాదమె నీకు స్వర్గము

అదియె ఊపిరి నీకు సతతము (2)

అది ఎరుంగక ఎవ్వరో 

ఓదార్చుటకు నిను చేరుకుంటే      (2)   || గుండె భగ్గున ||

                                                                                          రచన : శ్రీ కొంపెల్ల రామకృష్ణమూర్తి
                                                                                          సంగీతం : శ్రీ సుందర రావు
                                                                                   

ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/?snde2kuau6a51uo

Read More

మంచి మనసు

మంచి మనసు - తెలిపేదే స్నేహము 

మనిషి విలువ - నిలిపేదే స్నేహము     

మల్లె కన్న తెల్లని - జాబిల్లి కన్న చల్లని 

తేనే కన్న తీయని - ఏ నాటికి కైనా మారని   (2)      || మంచి ||

మనిషి మనిషి కట్టుకున్న - మరుమల్లెల వంతెనయె  స్నేహము 

మనిషిలోని మంచికి - మారు పేరు స్నేహము  (2)     || మంచి ||

ఆపదలో ఆదుకొని - ఆనందం పంచునదే స్నేహము

కలిమి లేమి అంతరాలు-  కానరాదు స్నేహము  (2)   || మంచి ||

                                                                  రచన, సంగీతం : అజ్ఞాతం 

ఈ పాట కావాలా? అయితే వినండి లేదా డౌన్ లోడ్ చేసుకోండి

http://www.mediafire.com/?9bozszne2p76p4z

Read More

ఈ యనంత విశ్వంలో

ఈ యనంత విశ్వములో - నేనెంతటి వాడను 

అణువునైన నౌదునా? పరమాణువైన నౌదునా 

కొందరితో పోల్చుకొన్న - గొప్పవాడ ననిపించును 

ఆకాశము వంక కనిన - అయ్యో అనిపించును           || ఈ ||

పర్వతముల ముందు నేను - పరమాణువునైనకాను 

ఉదధి ముందు నే నిలిచిన - ఒక బిందువునైన కాను  || ఈ ||

జగధీశుడు నాలోన - సదా వెలుగుచున్నాడట

సృష్టికర్త నేనేనట - సృష్టియెల్ల నేనేనట                       || ఈ ||

                                                                                      రచన : శ్రీ వక్కలంక లక్ష్మీపతి రావు

                                                                                      సంగీతం : శ్రీ ప్రాణలింగం
                                                                                      

ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/?99n0kemmisb0r39

Read More

మూగవోయిన మానస వీణ

మూగవోయిన మానస వీణ 

మరల రాగము తీయునా     (2)     || మూగ ||

మొగ్గలోనే తృంచిన కుసుమము 

పరిమళము విరజిమ్మునా (2)

హృదయ తంత్రులు మీటి మీటీ

మొదలు త్రుంచుట భావ్యమా (2)  || మూగ ||

నిప్పు రగిలి మోము కాలిన 

దోషము నాదన న్యాయమా (2)

మోడు వారిన జీవితాన 

మరల వసంతము వచ్చునా (2)   || మూగ ||

ఈ పాట కావాలా? అయితే వినండి లేదా డౌన్ లోడ్ చేసుకోండి 
http://www.mediafire.com/?6nylr5hb884lll1

                                                                                       

Read More

శ్రావణ మేఘమవో

శ్రావణ మేఘమవో - నా జీవన రాగమవో

కవికందని కల్పనవో - హరిచందన శిల్పమవో

కాముని పున్నమి వెన్నెలలో నీ కిన్నెర పదముల సవ్వడిలో 

ఎదపరవశించు నీ ఎంకి పాటలలో 

ఏదో తెలియని వలపు ధ్వనించే 

వీణియవో నా ప్రాణమవో రాగిణివో నా రాణివో

నీ కాలి అందియల సవ్వడిలో 

అనురాగ బంధాల సందిటిలో

నా డెందమలరించి పులకరించి 

మందార మరంద మాధురులు చిందిన   || శ్రావణ ||

నందనవని నీ గానము విని 

అది ఆమని అని మదినెంచి పులకించె

నీ అందముగని చందమామెయని

కలువచెలియ భ్రమచెంది వికసించె

కోయిలవో కాదు కోమలివే 

వెన్నెలవో కాదు కన్నియవే 

పగడాల మోవిపై తూలితూలి
పరువాల తావిలో తేలితేలి  

మధువు చిలుకు నవ కవిత లొలుకు 

అనురాగ సరాగ పరాగము కురిసిన      || శ్రావణ ||

                                                                           రచన,సంగీతం : శ్రీ అరవింద మిత్ర,
                                                                           గానం : శ్రీ యమ్. సత్యనారాయణమూర్తి . 

ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/?9cqqyc8jgqcqgec

Read More

అందమైన చందమామ

అందమైన చందమామ - ముందు నిలిచెనే

నా మనసులోన మధురమైన - హాయి నిండెనే 

నా మనసులోన మధురమైన - హాయి నింపెనే            || అందమైన ||

కొమ్మమీది  కోయిలమ్మ - పాడే కమ్మగా 

ఆ పాట విన్న నా మనసు - పరవశించగా (2)
మధుర భావనలలలో - సోలి పోవగా 

మధుర భావలహిరిలో - తేలి పోవగా - తూలి పోవగా     || అందమైన ||

కొలను లోని కలువ చేరే - కలువ రాజును 

కలవరించు గోరువంక - చేరె చెలియను     (2)

నిన్ను చేరి నా మనసు - మురిసి పోయెనే 

నిన్ను చేరి నా మనసు - ఎగసి పోయెనే - విరిసి పోయెనే  ||అందమైన||
                                                                                                                                                                                        

ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/?s3x7rce94rmat7t

Read More

ప్రేయసి నీ జాడ ఏది

విధి బలీయం..బ్రతుకు మోసం..బ్రతుకు భారం 

ప్రేయసి  నీ జాడ ఏది 

కాంచగలనా నీ అమృత హృదయం 

కాంక్షతీరే రోజులే మటుమాయమైనవి మాయగా 

ఏ కాంక్షతో నే నెదురు జూచిన కానరావే ప్రేయసీ      || ప్రే ||

జాతిమత కలహాలతో పెనుగులాడే లోకమా 

ప్రేమ తెలియక మనల వీడక భ్రష్టులనుగా జేసెను  || ప్రే ||

నిరతమూ నీ లీల గాంచి ఏడ్చుచుంటిని జాలిగా 

దయమాలిన ఈ సంఘము  మన కడ్డు బండయై నిలిచెను  || ప్రే ||

                                                                                              రచన,సంగీతం : పి.ఏ.రాజు

ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/?qtq4n8lc6fc4vqe

Read More

ఉదయించకోయి ఓ జాబిలి

ఉదయించకోయి ఓ జాబిలి

ఎదలోని బాధ కదిలించకోయి

కనుచూపుతోనే కరిగించినావు 

కలలేమో నాలో మిగిలించినావు 

నా శ్వాసలన్నీ నివాళించినాను (2)

నీ ఆశతోనే గుబాళించినాను   || ఉ ||

విరహాగ్నితోనే వేసారినాను

తొలినాటి ఆశ చిగురింపకోయి (2)

నీ ఊహలోనే విహారాలు చేసా

నీ ప్రేమలోని విషాదాలు చూసా  || ఉ || 

                                                        రచన : శ్రీ కోపల్లె శివరాం 

                                                        సంగీతం : శ్రావణ్

ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/?pzxd6e2msgpo4nw

Read More

మరలిరాదు జాలిలేదు (గజల్)

మరలిరాదు జాలిలేదు పరిమళానికి

నాకు చాలు గాలిపాట బతకడానికి   (2)

మౌనంలోనే బతుకు పరిమళించి పోతుంది

అపుడపుడూ కొత్త ఆశ పలకరించి పోతుంది

అయినా ఎవరున్నారని పలకడానికి

నాకు చాలు గాలి పాత బతకడానికి   (2)  

తలపులూ వలపులూ తలుపులేసుకుంటాయి

స్నేహాలూ మమతలూ రేవు దాటి పోతాయి

ఎవరూ లేరు గుండె గుబులు తెలపడానికి

నాకు చాలు గాలి పాత బతకడానికి    (2)

చైత్రాలు రావు ఇక వసంతాలు లేవు

పరిమళాలు వెలినేసిన తోట పూలు పూయదు 

గతమే చాలు ఒంటరిగా గడపడానికి

నాకు చాలు గాలి పాత బతకడానికి     (2)

                                                                                                       రచన : శ్రీ కలగా కృష్ణ మోహన్

                                                                                                       సంగీతం : శ్రీ నిర్మల్ కుమార్

ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/?u775r2qkb7l44ma

Read More

మలిగిన జ్ఞాపకాలలో (గజల్)

మలిగిన జ్ఞాపకాలలో దేని కోసం వెదుకుతావు 

ఊహల ఊపిరితో ఇలా ఎంతకాలం బ్రతుకుతావు 

నీ ముందున్నదిలే అంతులేని ఆకాశం 

ఆశల ఆసరాతో అలా ఎంతదూరం ఎగురుతావు   ||ఊహల ఊపిరితో||

మరువలేని ఆవేదనలో చివరలేని ఆలోచనలో 

తెలిసి తెలిసి ఏదో ఆశించి శూన్యమై నువ్వు మిగులుతావు || ఊహల ఊపిరితో||

దండలల్లిన మధురక్షణాలే మనసుమోసే శిలువలైతే 

చైత్రమైనా శిశిరమైనా మోడులానే గడుపుతావు  ||ఊహల ఊపిరితో||

చివికిపోయిన వలపు ఊసులు మదిని కలచే ప్రశ్నలైతే 

నవవసంతపు వేగుచుక్కవై ఎంతకాలం పొగులుతావు  ||ఊహల ఊపిరితో||| 

కళలు మాని కలతదేరిన ఎదురుచూపులు ఎవరికోసం 

పరిమళించిన గతము తలచి కంటి నీరై  కరుగుతావు  || ఊహల ఊపిరితో|| 

                                                                            రచన : శ్రీ కలగా కృష్ణమోహన్ 

                                                                            సంగీతం : శ్రీ నిర్మల్ కుమార్

ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/?d3pdrhhs9tfj6b3

Read More

రమ్మంటే చాలుగాని ( తెలుగు లో మొదటి గజల్ )

రమ్మంటే చాలుగాని రాజ్యాలు విడిచి రానా 

నీ చిన్నినవ్వు కోసం స్వర్గాలు నడచి రానా  || ర ||

ఏడేడు సాగరాలు ఎన్నెన్నో పర్వతాలు 

ఎంతెంత దూరమైన ఇంకెంత దూరమైన 

బ్రతుకంతా నడచి రానా  || ర ||

కనులందు మంచులాగా కలలన్ని కరిగిపోగా 

కావేరి వోలె పొంగి కన్నీరు తుడిచి రానా   || ర ||

నీవున్న మేడగదికి నను చేరనీయరేమో 

జలతారు చీరగట్టి సిగపూలు ముడిచిరానా    || ర ||

                                                                    రచన : దాశరధి 

                                                                    సంగీతం : శ్రీ పి.ఏ.రాజు

ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/?orjebws065lpfoz

ఈ పాట గురించి మరింత సమాచారం కొరకు  

http://hemalathaputla.blogspot.com/2010/11/blog-post_22.html

Read More

పాడకే నా రాణి

పాడకే నా రాణి పాడకే పాట
పాట మాధుర్యాల ప్రాణాలు మరిగెనే

రాగామాలాపించి వాగులా ప్రవహించి
సుడిచుట్టు గీతాల సురగిపోనీయకె || పా ||

కల్హారముకుళములు కదలినవి పెదవులు
ప్రణయపదమంత్రాల బంధించె జీవనము || పా ||

శ్రుతిలేని నామతికి చతురగీతాలేల

గతిరాని పాదాల కతుల నృత్యమ్మటే || పా ||

Read More

మరచిపోయినావ నీవు

మరచిపోయినావ నీవు మాధవా

రాధ ఎదలో బాధ

గాధలుగా మలిచేవా || మ ||

వేచి వేచి చూచినాను

వెదకి వెదకి విసిగినాను

కాటుకతో కనుల నీరు

కరిగి యమునగా పారెనా || మ ||

వంశినై నే నుదయించి

వాతెరా తీపిని గ్రోలుదు

అనుక్షణమ్ము అధరముపై

వలపు పాటలను పాడుదు || మ ||

Read More

మరపురాని కలలు గని

మరపురాని కలలు గని

మరుదినమ్ము మేలుకొని

నిరాశయే మిగులునని

తెలుసుకొంటివా మనసా

అలసి యుంటివా(2)

ప్రేమ నిన్న రోజుదని

నేడు కరిగి పోయెనని

వేదనయే రేపటిని

తెల్లమాయెనా

గుండెలు తల్లడిల్లెనా(2) || మ ||

చిగురు ఎండి రాలునని

ఎగిరిపోవు కోయిలని

క్షణికమే వసంతమని

కనుల గట్టెనా

అశ్రులు కరగి రాలెనా

మనసా అలసటాయెనా (2) || మ ||


                                                  రచన : శ్రీ మల్లవరపు విశ్వేశ్వరరావు 
                                                  సంగీతం : శ్రీ చిత్తరంజన్ 

ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/?79hm9myj9a0i3wa

Read More

ఈ చల్లనిరేయి

ఈ చల్లనిరేయి

తిరిగి రానేరాదు

నీ చక్కని మోము

చూడ తనివి తీరదు || ఈ ||

మినుకు మినుకు మనెను కనుల

వెర్రి తారలు

ఆదరిపడెను నా మనసు

వెయ్యిసారులు || ఈ ||

అందమైన చందమామ

చేతి కందదు

అందువరకు నా మనసు

తృప్తి చెందదు || ఈ ||

ఎవరి కొరకు నా హృదయము 

ఎదురు చూచునో

తెలియరాదు వలపుగాలి

ఏల వీచునో || ఈ ||

                                                                                                                రచన : శ్రీ ఆరుద్ర 

                                                                                                            సంగీతం : శ్రీ ప్రాణ లింగం 



ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/?buy82vca7trbypq

Read More

వాడిపోయిన పూలలోన

వాడిపోయిన పూలలోన

వన్నెచిన్నెలు ఎచటివో (2)

తీగ తెగిన వీణలోన

మ్రోగు స్వనములు ఎవరివో (2) || వా ||

కళలు మాసిన చంద్రబింబం

నిండువెన్నెల విరిసెనో

సాగిపోయే నీలిమేఘం

పూలవానలు కురిసెనో || వా ||

శిధిలమైన మనసులోన

మధురస్మృతులు ఎవరివో

హృదయకుసుమం విరిసి విరిసి

నింగిదారుల కెగెసెనో || వా ||

                                             రచన : శ్రీ ఆచార్య తిరుమల 

                                             సంగీతం : శ్రీ గోపాల కృష్ణ 

ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/?lmiki7jtf2e455r

Read More

నీ అందె రవళిలో

నీ అందె రవళిలో

నా డెందమలరగ

నా గళాన సొంపులో

తేనె జల్లు నింపనా|| నీ ||

పూవులు పులకించగ

వెన్నెల విరబూయగ

మధుర మధుర లోకాలలో

నీకు జోలపాడనా || నీ ||

రాగతాళ లయలలో

పదములు కదిలించగ

లలిత లలిత రాగాలతో

వలపు గీతి పాడనా || నీ ||

                                       రచన : శ్రీ శామ్యూల్

                                       సంగీతం : శ్రీ పి.ఏ.రాజు 

ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/?bj1c7v0m89m1w1a

Read More

దిగిరావె అందాల

దిగిరావె అందాల

దివినేలిన రాణి

కవిరాజు పెదవిపై

కదలు మధుపాత్రవై || దిగి ||

కలలోని కాంతిగ

ఇలలోని సుఖముగ

విరిలోని తేనెగ

కరిగిపోవకే సఖీ || దిగి ||

నా గళములో నిలచి

నిలచి వెలువడబోకే

అమర సుందర భావన

గీత రాగిణీ

బృందావనాంతర

ముకుంద మురళీ రవమై

గాన మధురేఖవై 
గంధవహరధమ్మువై || దిగి ||

                                                                        రచన : శ్రీ ఇంద్రగంటి హనుమచ్చాస్తి 
                                                                         సంగీతం : అజ్ఞాతం 

ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/?j64ovk9349kkk32

Read More

పాడలేని వేళ

పాడలేనీ వేళ

ఎలకోయిలై నేను

రాగతంత్రులు మీటి

రవళించగా లేను || పాడ ||

శిధిల శిశిరము జూచి - చిన్నబోయిన నేను

మాధురీ సుధలతో - మదిని నింపగలేను

విరహవేదన తోడ వేగిపోయే వేళ

ఆలపించగ లేను ఆశ్లేష గీతికను || పాడ ||

నవసి పోయిన విరులు

ఇరులతో మొరపెట్టి

కమలి పోయిన కురులు

దీనముగా నవ్వేను

ఎదురు చూచిన కనులు

వేసారి  పోయినవి

ఎండుటాకుల జూచి

పాదలేదీ గుండె  || పాడ ||

                                       రచన : శ్రీ పైడిపాల 

                                       సంగీతం : శ్రీ కృష్ణా రావు 



ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/?hl8826obt1l744q

Read More

కలలో నీవైతే (గజల్)

కలలో నీవైతే

కలయే నిజమైతే

నిన్ను కలవరించనా

కలనే వరించనా     || కలలో ||     

ఏ చిరుగాలులు వీచినా

నీవని తలచితిని

తడబడి నిలిచితిని

నువ్వు రాకనే దరిలేకనే

ఏ విధి మనగలను || నిన్ను ||

ఏ సిరివెన్నెల నవ్వినా

నీ కనుచూపులుగా

ఆవిరి తూపులుగా

మది నెంచనా విలపించనా

నీకై తపియించి || నిన్ను ||

                                                                                                        రచన : శ్రీ నిర్మల్ కుమార్ 

                                                                                                        సంగీతం : శ్రీ కోపల్లె శివరాం

ఈ పాట కావాలా? అయితే వినండి లేదా డౌన్ లోడ్ చేసుకోండి
http://www.mediafire.com/?1jm9y8nv1dscvmd

Read More